(حوار يومي1)
- انت مؤمن بربنا؟؟
* وانت مالك؟؟؟
- يبقى انت ملحد؟؟
* وانت مالك برده؟؟؟
- مادام قولت "وانت مالك" يبقى انت ملحد ..
(!!!)
(حوار يومي2)
- انت زمان كنت بتصلي وكويس .. ليه بقيت كده ؟؟
* كده ازاي يعني ؟؟
- بتفكر يعني فحاجات ماينفعش تفكر فيها
* وهو التفكير حرام ؟؟
- لأ بس فيه حاجات حرام نفكر فيها لأنها ثوابت
* وهي الثوابت بتيجي منين غير بالتفكير
- اتقي الله واحمد ربنا انك اتولدت مسلم
* يعني الثوابت ثوابت لأني اتولدت عليها ؟؟؟
- لأ بس انت ربنا اختارك علشان تبقى مسلم .. ماتضيعش النعمة دي
(!!!)
(حوار يومي3)
- انت لازم تقرا قرآن زي زمان علشان ربنا يهديك
* أنا بقرأ قرآن أكتر من الاول وبحاول أفهمه أكتر
- لأا اقراه بقلبك مش علشان تحاول تفهمه
* بس أنا عاوز أفهمه
- مش لازم .. المهم تطلب من ربنا يهديك
(!!!)
(حوار يومي4)
* انت ليه بتقول ان الاسلام متخلف .. انت ناسي الرازي وابن سينا ؟؟
- لأ .. بس الرازي وابن سينا كانوا ملاحدة
* حرام عليك ماتقولش كده .. حرام تكفر حد
-أنا مش بكفرهم .. بس فقهاء السلطة أيامهم همه اللي كفروهم
* ماتشتمش الفقهاء يا كافر
(!!!)
(حوار يومي5)
* حرام على فكرة تزدري الاسلام
- أنا مش بازدريه أنا باتكلم عن الحاجات الغلط اللي فيه
* لا انت لازم تحترم ان فيه ناس مؤمنه بالكلام ده
- طب مالشيوخ بيزدروا المسيحية فكل حتة وفكل الجوامع
* لأ مش بيزدروها .. دول بيتكلموا عن الحاجات الغلط اللي فيها
(!!!)
(حوار يومي6)
* انت ازاي كافر بربنا؟! .. مش بتحتاجه لما تحس انك متضايق ؟؟
- علشان كده بقول احتياج الانسان خلاه يعمل الدين بعقله (الحاجة ام الاختراع)
* لأ ربنا هو اللي عملنا الدين لأنه عارف اننا هانحتاجه مش عقلنا اللي عمله
- طب ليه مش عملنا بقية الحاجات اللي كنا محتاجينها ؟؟
* امال ايه فايدة العقل
(!!!)
(حوار يومي7)
* لو انت بتدعي إن ربنا مش موجود يبقى الكون ده جه منين ؟؟
- اكتشاف جسيم هيجز أثبت ان الانفجار الكبير هو بداية الكون
* طب ايه قبل الانفجار الكبير؟؟!!
- معرفش لسه العلم ماكتشفش
* شوفت بقى .. يبقى ربنا كان قبل الانفجار الكبير .. وهو اللي عمله
- طب ايه قبل ربنا ؟؟!!
* حرام عليك ياكافر .. انت بتقول ايه اللي قبل ربنا
(!!!)
د. أحمد الغيطي
ليست هناك تعليقات:
إرسال تعليق